رفض قاضي أمريكي طلب الفنان "ديدي" بالإقامة الجبرية في جزيرته الخاصة بفلوريدا، في انتظار محاكمته.

القضية اللّي جذبت الأنظار هادي وقعات يوم الجمعة 22 نونبر ، فجلسة قضائية بنيويورك، حضروها محاميي "ديدي" وحتى عائلتو. محاميي المغني اقترحو أن الإقامة الجبرية تكون فدارو اللّي فجزيرة "ستار آيلاند" بفلوريدا. هاد الدار الكبيرة كانت وحدة من الممتلكات اللّي تعرضات للتفتيش من طرف السلطات الفيدرالية فشهر مارس اللّي فات.

الجزيرة الخاصة اللّي كاينة فيها دار ديدي معروفة بأنها عندها غير طريق واحد للدخول والخروج، وحتى داك المرسى الخاص اللّي عندو فالدار، وعدو المحامين بأنو ما غاديش يستعمل شي قارب فحالة الموافقة على طلب الإقامة الجبرية. ولكن القاضي "أرون سوبرامانيان" جاوب بكل صرامة : "هادشي ما غاديش يكون!".

من بعد ما ترفض الطلب الأول، محاميي ديدي اقترحو حل آخر: الإقامة الجبرية تكون فشقة ديالو اللّي كاينة فـ Upper East Side بنيويورك. هاد الاقتراح شمل وجود حراسة أمنية 24/7، بحال جوج حراس فالشقة اللّي فيها ثلاث غرف، وحارس ثالث كيشرف على الدخول والخروج من تحت.

باش يزيدو يطمئنو المحكمة، المحاميين وعدو بأن ديدي ما غاديش يكون عندو لا هاتف لا إنترنت للاستخدام الشخصي، باستثناء الاتصال بمحاميي الدفاع اللّي غادي يكون منظم من طرف فريق الحراسة. هاد الترتيبات حسب المحاميين، غادي تكون أكثر صرامة من ظروف الاعتقال اللّي كاينة فـ"Brooklyn Metropolitan Detention Center"، السجن اللّي موجود فيه ديدي دابا.

زيادة على هاد القيود، ديدي ما غاديش تكون عندو زيارات شخصية إلّا من طرف المحاميين. أما زيارة العائلة، فهي ممكنة ولكن ضروري أنها تكون بموافقة مسبقة من المحكمة وتكون مراقبة من طرف الأمن. فالجلسة، حضرات أم ديدي وحتى أولادو باش يساندوه فهاد المحنة.

هاد الطلب الأخير هو الرابع ديال ديدي باش يخرج بكفالة. قبل هاد المرة، المحكمة رفضات ليه ثلاث طلبات من شتنبر، اللّي هو الشهر اللّي تم فيه اعتقاله بنيويورك، بسبب اتهامات خطيرة تتعلق بالاتجار بالبشر والتنظيم الإجرامي. ديدي أكد بأنه بريء من جميع التهم اللّي موجهة ليه.

فهاد الطلب الجديد ، المحاميين ديالو اقترحو كفالة ضخمة وصلات لـ50 مليون دولار، باش يزيدو يقنعو المحكمة. ومن المنتظر أن يتم اتخاذ قرار نهائي بشأن طلب الإفراج الأسبوع المقبل.