بزاف ديال البنات اللّي عندهم قامة قصيرة كيشوفوها نقطة ضعف، ولكن بالعكس، ممكن تستافدو منها وتبانو فإطلالة رائعة "Top".

ممكن يكون عندكم قامة قصيرة، ولكن هاد الشي ماشي عائق باش تلبسو بطريقة ذكية وتبانو طوالات وأنيقات. بالعكس، مع شوية نصائح بسيطة اللّي غنقدموليكم غاتقدرو تستغلو قصر القامة ديالكم لصالحكم وتخلقو إطلالات واعرين بزاف.

وحدة اللون من أهم التقنيات اللّي كتعطي الوهم ديال الطول. مثلاً، إذا لبستو نفس اللون من الفوق للتحت، بحال الأسود، الأبيض أو حتى درجات البيج خاصة فهاذ الوقت من السنة، غادي يبان جسمكم وكأنه طويل لأنكم كتخلقو خط مستقيم فالإطلالة.

السراويل أو "الصايات" اللّي كيوصلو فوق السرة كتزيد في الطول ديال الرجلين، وهاد التقنية كتزيدكم طول بطريقة فنية وبسيطة. جربو سروال الجينز أو "صاية" بخصْر عالي، مع تيشيرت محشور فالسروال، غادي تحسو براسكم أطول بشكل فوري!

واحدة من الأخطاء اللّي كتديرها بعض البنات القصيرات هي لبْس الملابس الفضفاضة اللّي كدير العكس وكتقصر القامة. في المقابل حاولو تلبسو ملابس كتجي على قد الجسم باش تبيّنو الخطوط الطبيعية ديالكم وهادشي تيعطي إيحاء بالطول.

ماشي ضروري تكون الأحذية عالية بزاف، يكفي كعب خفيف غير شوية وغادي يزيدكم طول. ومن الأفضل تختارو الأحذية المدببة من الأمام، بحال الصنادل أو الأحذية اللّي كتوصل للقدم فشكل مدبب، هاد النوع كيعطي الوهم بأن الرجلين طوال.

الملابس اللّي فيهم خطوط عمودية غادي يعاونوكم بزاف، وهاذ الحيلة قليل اللّي عارفها. حيث كيعطيو الوهم بأنكم أطول. جربو فساتين أو بلايز بخطوط طولية، وابتعدو على الخطوط الأفقية حيث كيديرو العكس تماما.

واحد من أهم الحيل هو إذا كنتو حابين تحطو حزام فالإطلالة ديالكم، اختارو واحد رفيع، حيث الأحزمة الغليظة كتقسّم الجسم ديالكم على جوج وهادشي تيزيد يبينكم أقصر. الحزام الرفيع غادي يخلي توازن فالإطلالة ويعطي إيحاء بالطول.

البلوزات القصيرة "crop tops" مثلاً كتجي رائعة مع سروال أو "الصاية" بخصر عالي، حيث كترفع نقطة بداية الرجلين وكتخليكم تبانو أطول. هاد الإطلالة كتعطي توازن فالمظهر وتبرز القوام ديالكم بشكل أنيق.

وفي الأخير، ما تنساوش أن أهم حاجة هي كيفاش كتتعاملو مع مظهركم. الثقة بالنفس كتلعب دور كبير فالجاذبية. كيف ما كنتو لابسات، إذا كنتو مرتاحات ومقتنعات براسكم، غادي تبانو رائعة و"Top" ديما.

بهاد النصائح العملية، غادي تقدرو تستغلو القامة ديالكم لصالحكم وتخلقو إطلالات اللّي تعطي إيحاء بالطول والجاذبية. أهم حاجة هي تعرفو تختارو الملابس بطريقة ذكية وتكونو واثقات من راسكم، حيث هاد الشي كيعطي جمال وجاذبية إضافية!