بزاف دالعيالات اللّي كيعانيو من الوزن الزايد كيواجهو صعوبات فاختيار اللباس اللّي كيخليهم يحسو بالثقة ويبرز أناقتهم. كيف ما هو معلوم ، أغلب البنات أو النساء كيتأثرو بالصورة اللّي كيقدموها وسائل الإعلام على الجسم "المثالي"، وهادشي كيخليهم يبغيو يقلدو لبس ماشي مناسب ليهم، غير باش يكونو بحال النماذج اللّي كيبانو فتلفازة ولا فالمجلات.

ولكن اللّي معرفينش هو أنه كل جسم، خلقه الله باش يتماشى مع صاحبه، وهنا عندنا بزاف ديال الأمثلة، ناس كانو غلاظ ومن مور ما تقاتلو باش يصبح جسمهم رشيق فقدو ديك الجاذبية اللّي كانت عندهم في الاول.

السؤال، واش المشكل في الجسم أصلا أو في طريقة اللّبس؟

هادشي علاش جبنا ليكم حلول في إختيار القطع اللّي خاصك تلبسي وفي المقابل قطع خاصك تبدلّيهم، باش تباني بطريقة جذابة ويعجبك راسك.

من بين القطع اللّي كتواكب الموضة وكتناسب العيالات اللّي عندهم وزن زايد، كاينة الفساتين اللّي فيها حزام على الخصر ، حيت كتساعد فإبراز منطقة الخصر وكتمكن من التوازن فالمظهر. حتى البدلات الرسمية الفضفاضة بقات كتواكب الموضة وكتزيد العيالات أناقة، خصوصا اللّي جاكيتها مستقيم وسروالها واسع شوية.

التنانير أو "صاية" ديال الـ A-Line ، حيت كتعطي توازن زوين للجسم وكتبان بشكل أنثوي وعصري، وكتقدر تتلبس مع تيشيرتات واسعة أو بلايز قصيرة. ومن القطع اللّي كتزيد الأناقة هي السترات الطويلة اللّي كتكون تقريبا عند الفخذ أو الركبة، حيت كتزيد الجسم طول وانسيابية زوينة. حتى السراويل اللّي الخصر ديالها عالي كتخدم مزيان، حيت كتبرز الخصر وكتعطي توازن زوين فالإطلالة.

الآن غنتكلمو على بعض الحوايج اللّي خاصكم تبدلوهم ، باش تحافظو على مظهر متناسق وأنيق.

الإبتعاد على الملابس اللّي ضيقة بزاف ، حيت كتبرز المناطق اللّي ممكن ما تبغيش المرأة تركز عليها، فالأفضل نختارو حوايج واسعة شوية ومريحة. الألوان الفاتحة بزاف أو اللّي فيها لمعان تقدر تزيد من عرض الجسم، من الأحسن اختارو ألوان داكنة ولا ألوان متناسقة هادئة.

من الأفضل تفادو البلايز اللّي عنقها واسع بزاف ، حيت كتزيد كتوسع الأكتاف، وبلا ما ديروها اختارو مكانها دات الشكل V حيت كتطول العنق وكتعطي توازن للإطلالة. وكنصيحة أخرى، من الأحسن تبعدو على "الصايات" القصيرة بزاف ، حيت تقدر تبين الجزء السفلي بشكل أكبر، واختارو الطول اللّي على الأقل واصل شوية تحت الركبة.

باختيار القطع المناسبة، وتجنب اللّي ما كيتماشاش مع الجسم، يمكن للعيالات و البنات اللّي عندهم وزن زايد يبانوا بأحسن مظهر ويعيشو أناقتهم بثقة، حيت كاين دائما حوايج كتلائمهم وتزيدهم جمال وجاذبية بطريقتهم الخاصة.