وكالة HYBE خرجات ببيان رسمي بعدما أعضاء فرقة NewJeans ، اللّي معروفين دابا باسم Jeanz بسبب الصراع مع الوكالة على العقد الحصري، قررو يفتحو حساب جديد على السوشيال ميديا بلا ما يستاشرو معاها.

فالبيان اللّي خرج نهار 18 دجنبر، قالت HYBE : "حنا مخصصين قنوات رسمية باش NewJeans يبقاو قريبين من الفانز ديالهم، بحال Instagram و X (تويتر سابقاً)، وزيد عليها منصات أخرى. كنتمنو أن الأعضاء يبقاو يتواصلو مع المعجبين عبر هاد القنوات الرسمية بحال ديما".

وزادت الوكالة : " أي حساب جديد على السوشيال ميديا اللّي ما داراتوش HYBE، ما تشاورناش فيه من قبل، وهادشي مخالف لبنود العقد الحصري. بزاف ديال المعلنين وحتى أطراف أخرى قدمو شكاوي واستفسارات على المحتوى اللّي كاين فهاد الحسابات، وهادشي ممكن يجرنا لمشاكل قانونية. هاد المخاوف نقلناها للفنانين والمحامين ديالهم".

الفرقة من ناحيتها فتحت نهار 14 دجنبر حساب جديد تحت اسم jeanzforfree وبدات كتقرب أكثر من Fans ، كتنشر صور وفيديوهات حصرية من الكواليس. وأكدو للمحبين ديالهم بلي الحساب ديالهم فعلا، برسائل واضحة: " راه هاد الحساب ديالنا بصح"، و" اشتقنا ليكم بزاف وغادي نبقاو هنا نشاركو بزاف".

هاد الخطوة جات مباشرة بعدما الفرقة علنات على فسخ العقد ديالها مع HYBE فنهار 29 نونبر ، وهو ما خلا الوكالة ترفع دعوى قضائية فمحكمة سيول المركزية باش تأكد صحة العقد.

من ديك الوقت، الفرقة بانت عليها علامات الاستقلالية نهار 7 دجنبر ، فحفلة المغني الياباني YOASOBI فكوريا، ما قدموش راسهم باسم الفرقة الرسمية NewJeans . وزيد عليها، فآخر جلسة تصوير داروها مع مجلة Vogue Korea، اكتفاو بذكر أسماء الأعضاء بشكل فردي بلا ما يذكرو اسم المجموعة، واللّي كيبان كإشارة واضحة للاستقلال ديالهم.